尋寶

屋企附近有間明愛開嘅二手店（似跳蚤市場格局）。疫情前冇乜機會去，疫情間又好多時冇開。

難得經過附近，行去八一八有冇嘢睇啦。

店內嘅舊物品都係人捐出嘅。呢日突然被啲CD吸引咗我。

搵到啲 "童年" 回憶。

收據列明唔包用得，冇得退貨。

而政府原來好有良心, 係冇收銷售稅。

另外，某日見某藥妝店嘅CD部（對，藥妝店似百貨公司）嘅CD只係5歐隻。

雜錦碟一套五隻都係5歐。抵到爛。

買咗。。。但係屋企只有鬧鐘收音機可以播CD。

咁繼買唱機之後，依家進化到去discman喇。呢部新機好厚身，仲要係入電芯, 30歐。

款式out過我對上一次買嗰部（應該係廿幾年前）嘅超薄機。而嗰部機因為要時時叉電，又因追潮流買咗MP3機而入咗冷宮。冇帶過嚟。

 

咁大投資買咗部機。於是又去藥妝店睇吓有冇平CD。

又去多次二手店尋寶。

尋回以前擁有過嘅CD。