(運)吉日

4月3 呢日嘅目的地係米蘭。由Bergamo有火車到, 唔使轉車。
因為唔知㗎車迫唔迫,咁豪畀佢,買頭等啦（只係差兩歐）。
但係頭等同二等唔覺有分別, 頭等好似仲差過奧地利二等。

喺車上睇吓張飛，冇時間的。應該係乜嘢時間都可以上嗰個方向嘅車。
再睇吓背面。。。冇劃位要打卡？咁即刻喺車上, 喺月台搵部機啦.
唔見, 心諗可能查飛嘅會幫我印。
查飛喇。。。

• 你冇打卡喎. 罰款50歐(車費只係8歐幾)。速速磅，唔好兩頭望。
• 都唔見有機. 你唔可以幫我印嘅咩？
• 部機喺火車站度(售票地方），你依家畀唔畀吖?
• 我係遊客唔知喎. 冇錢, 唔畀！！
• 唔畀我報警，到時收你double。米蘭警察到時同你傾。
• 你咪報囉 (唔信冇酌情).

佢又真係call人喎. 然後繼續查飛去. 
點好呢??  落車先啦, 送羊入虎口咩。

喺下一個站即刻落車，即刻閃咗人. 唔係即刻去反方向月台, 而係睇吓呢度有乜行...

一出火車站係住宅區，冇嘢睇的。
OK,定下神來。下一步點做。。。打卡，搭一個鐘後嘅下一班？可能警察喺米蘭等梗我喎....都係唔去嘞，返Bergamo。
之後買過一張飛同打印,等車返歸。（圖中就係打卡機喇）

就係呢張飛喇。奧地利咁印得靚靚嘅飛係唔使打卡㗎。咁就出事了。

其實喺自助售票機買係要揀班次. 買飛時佢會提你小心扒手，小心唔係職員嘅人嚟幫手. 但係就冇提你要去打卡。而通常啲人會睇吓票面啲資料啱唔啱, 但票面就冇叫你去打卡。都唔知係咪呃遊客嘅技倆。

喺Bergamo，因為落大雨，除咗行超市就乜都冇做過.