2016年7月12日星期二

做臭男人?

話說熱水爐突然星期五壞咗. Google話可能係燒fuse咗。見自己拆開佢都幾複雜,都係搵人整啦。師傅嚟睇,話係電子零件壞,佢整唔到。咁急急搵管理公司搵人嚟睇啦. 呢個師傅都係同一答案, 話要搵熱水爐公司配電路板喎。但係星期五太遲了,星期一請早.......吓星期五已經weekend??? 三日冇熱水唔得喎,呢度水喉水係冰水,冇可能沖凍水涼喎。三十幾度唔沖涼,唔通要做臭男人?唯有回歸原始,用盆!

管理公司星期一冇咗件事,唔追佢真係會白等。
嚟嗰個師傅又hea住做,明知係乜壞佢都係要自己再驗過先.佢睇過真係要換電路板先落樓再拎上嚟。塊嘢又唔係大,做乜唔一次過拎上嚟呢?? 都唔知佢係咪段分鐘計人工嘅。
諗諗吓好彩係夏天壞咋.如果冬天先嚟壞,冇咗暖氣都唔知點算。

52 則留言:

  1. 雖然夏天天氣熱,我也沖暖水浴,感覺舒服些!

    回覆刪除
  2. 諗起細過時冲凉前要等一陣用火水爐煲滾水,屋企十幾個人得兩個爐咋!一定排晒隊,拎住桶熱水到水喉房溝凍水,再入公共浴室冲凉,邊有依家咁方便快捷。

    今年夏至後我已經冲凍水凉啦!好爽呀!又可以慳翻啖煤氣。

    回覆刪除
    回覆
    1. 好在我都係嗰個年代成長。識得拎住桶熱水溝凍水.
      我喺HK都冇沖凍水涼㗎。

      刪除
  3. 我呢邊只會嫌水唔够凉/ 凍 :P

    回覆刪除
    回覆
    1. 呢度唔得喇,啲水凍到手都僵。

      刪除
  4. 沖凍水先身體健康呀 ,沖完成個身都熱.

    回覆刪除
  5. 王子要煲水沖涼咁慘? 無參加 gym club 咩? 有就可以去沖, 唔駛煲水 XD

    回覆刪除
    回覆
    1. 我郁都唔願郁邊會join gym club.

      刪除
  6. 好在整返好! 點解唔係揾業主安排整?

    回覆刪除
  7. 如果冬天壞的話唔沖幾日涼都唔係好覺既:P

    回覆刪除
  8. 你算好啦,我哋上排整洗衣機,佢係揸車嚟,都唔放定啲parts响架車,最後要分兩日,成10日成搞掂。

    回覆刪除
  9. 咁搞法,先前嚟check嗰位師傅要唔要俾錢?
    鬼佬做嘢一樣都好蠱惑㗎,其實咪係想掠水!

    回覆刪除
  10. 你有個大盆呀?定係要去買?

    回覆刪除
  11. 附近冇公共浴堂咩?!!若果唔係太多汗,唔沖幾日都得嘅~~

    回覆刪除
    回覆
    1. 有,但係沖完行返屋企會行到一身汗。

      刪除
  12. Now the home appliance involves lots of electronic parts and is not so mechanical. Repair of it now usually involve total replacement of the electronic parts.

    回覆刪除
    回覆
    1. 電子嘅部分壞咗自己整唔到。

      刪除
  13. 如果這裡夏天冇冷氣真係人都癲㗎

    回覆刪除
    回覆
    1. 我慣咗呢度三十幾度冇冷氣。

      刪除
  14. 你哋係用獨立熱水爐㗎?咁你廚房嘅水喉水都係只得冰水?
    你都可以check吓邊度可以免費沖涼,例如大學嘅體育場所,如果管得唔嚴你其實可以偷偷入去 :p
    你哋有無公共泳池或公共體育場所?都可以免費沖涼㗎 :D

    回覆刪除
    回覆
    1. 廚房嘅熱水都係呢個爐出。
      印象大學嘅體育場有實Q睇門口。
      公共泳池要錢入場,我唔游水,唔會去啦。

      刪除
    2. 咁你個熱水爐係裝喺邊度?香港嗰啲裝喺浴室度,只係個花洒有熱水咋
      我度啲熱水爐全部都好巨型,好似你呢啲咁細嘅爐我度無得賣㗎

      刪除
    3. 熱水爐嘅熱水走勻全屋㗎。暖氣都係用熱水。通常裝喺浴室,但係我見過裝廚房都有。

      刪除
    4. 呀,我知喇,你嗰啲係即熱式熱水爐,香港嗰啲(舊式嘅)係儲水式,我仲奇怪點解你個爐咁扁嘅。咁呢啲即熱式我度都有賣,但大多數屋都仍然用好巨型嗰種儲水式

      刪除
  15. 師傅上門望一望果D駛唔駛收檢查費?

    回覆刪除
  16. 30幾度要冲熱水,你咁大隻....咁弱架,用冰水好正呀,
    之前我屋企煤氣熱水爐壞咗,服務幾好,
    24小時內整好,換零件$1500

    回覆刪除
    回覆
    1. 我喺HK都冇沖凍水涼㗎。
      呢度冇咁高效率。

      刪除
  17. 用盆/桶沖涼洗頭洗面,我響印度已經慣嗮。上禮拜我響Aix-en-Provence自願性沖凍水涼,30幾度,民宿又響頂樓,完全無空調,連風扇都無。

    回覆刪除
    回覆
    1. 無空調,連風扇都無我度都可正常㗎。

      刪除
  18. 真係好彩係夏天咋..冬天就慘啦!!!

    回覆刪除
    回覆
    1. 如果係冬天可能我會開個焗爐取暖。

      刪除
  19. 我記起立陶宛時,玩左成日,冰水都忍凍嚟沖。。。
    但王子你唔去d朋友屋企或運動場沖?

    回覆刪除
    回覆
    1. 點解你嗰次冇熱水?
      都有諗過㗎。但係大熱天時去人度沖完返屋企會又成身臭汗囉.

      刪除
    2. 住宿太殘舊,係住宿嘅問題,無計⋯
      但歐洲大陸熱得嚟唔係應該較乾燥咩?

      刪除
    3. 比香港乾燥,但係都有汗出㗎。

      刪除
  20. 點解Google可以知道你個爐壞左咩嘅?

    回覆刪除
  21. 係國外有家居修理都好煩,完全明白你的心情!

    回覆刪除

入咗嚟,不如寫幾隻字,留個言啦.