2016年7月9日星期六

租屋

最近睇咗一篇關於德國租屋嘅報到。情況同維也納差唔多。


經地產揾,你係要畀佣地產嘅。印象好似係要畀兩三個月嘅租金嘅金額。要睇入息證明。但係啲經紀嘅態度好似有生意唔想做咁,唔似得香港嗰啲咁搏。。
好多人唔想經地產就會喺啲本地知名租盤網站放租/搵盤。業主只安排一日睇樓團. 準租客要同一時間去. 睇樓時喺好多人嘅情況下業主會問吓你職業,入息(其他人都會聽到的,完全冇私隱)。最後電話通知業主揀唔揀中你.
但係又有啲業主你直接搵佢佢唔肯個喎,係都要你搵佢個經紀。我懷疑個經紀係佢啲親戚or friend,想醒佢有佣賺。


【星島日報報道】不少朋友話移民德國,因其低租金、合作社建屋等政策夠吸引。女兒同學的父母最近移居德國栢林,在港越洋租屋,經驗是業主知你不懂德文,立 刻說不。租金的確平,一千三百方呎租約一萬三千港元,問題是業主堅持這面積只准最多三個人住,一知道朋友一家五口,又會拒絕!最有趣是準租客要看屋,先要 給工作和收入證明,再與其他準租客組成一行十多人的睇樓團,一同進入單位,營造你爭我奪氣氛!

53 則留言:

  1. Interesting. I read some news that the culture is ppl. in Germany prefer renting, ppl. in Spain prefer buying. What about Austria's?

    回覆刪除
    回覆
    1. 我冇睇過相關調查,唔知邊個多啲。

      刪除
  2. 業主都好揀擇,獨居老人、有細路仔、殘障嘅咪好難租樓囉?
    王子畀人嫌棄過未?

    回覆刪除
    回覆
    1. 都唔係嘅,最主要係睇你有冇收入,交唔交到租。
      我嫌棄人多d.

      刪除
  3. 嘩!去外國做地產經紀都幾好,據我知美國買賣物業,經紀是收6%樓價做佣金.

    回覆刪除
    回覆
    1. 但係我度o個d冇HKo既咁搏個喎.

      刪除
    2. 你嗰度福利好,咪唔使搏,香港做乜行業都好,就算係幾搏命搵錢,都買唔到磚頭囉~

      刪除
    3. 可能係喎,冇生意都唔憂。

      刪除
  4. 乜咁鬼麻煩, 如果遇到好似係台灣果2件港女租客, 又先排香港個搞到間屋上千隻小強既租客, 果業主咪發癲.

    回覆刪除
    回覆
    1. 如果搬走,間屋要還原番㗎呢度.例如要油番油先搬走得。

      刪除
  5. 租客可能易請難送,所以要揀擇啲。

    回覆刪除
  6. 歐洲租屋同香港差唔多啫,由經紀處理安全好多,錢喺要俾人賺,
    租客入息證明喺必要,要檢查是否租霸黑名單,
    而經紀仲要驗證地契業主身份,
    我只聽過香港人移民一定買樓,好少租,
    打工除外。

    回覆刪除
  7. 聽聞呢度租屋都唔易架, 要交個 profile 俾業主慢慢揀
    有D地產 agent 話有個吉屋 list, 可以俾錢買, 自己再打電話去問, 無保證架, 睇過報導, 有D係呃人, 個電話係打唔通架

    回覆刪除
    回覆
    1. 吉屋 list....乜冇地產網嘅咩?

      刪除
  8. 做樓產經紀有好有唔好,樓市旺大魚大肉換靚車,而且仲會揀客。如果唔好,或單做租務管理,我呢邊的經紀收入就不太多了!

    回覆刪除
  9. 我度係如果係外國人,非德國人,租屋已經有一定困難
    不過我覺得篇報道有好多唔可信嘅地方

    回覆刪除
    回覆
    1. 如果唔係德國人,扣分/唔考慮;唔識講德文,扣分/唔考慮;有公司信,加分;有細路;扣分;有寵物,唔考慮;屋企人數多,扣分;有長期收入老人家,加分
      同埋睇樓團其實唔係為咗要競爭,係費事逐個逐個招呼,想一次過搞掂晒
      好嘅盤通常會响1-2小時內無咗
      薪金反而唔會問,因為怕會觸及私隱條例
      業主只要書面通知咗,就可以成日嚟check下間屋
      冇死約,所以兩面想解約都好方便,但係業主要加租都好方便
      除咗屋租,仲有一堆雜費或者功夫要攤分
      冇乜人會搵agent租屋,買屋先有啲機會搵銀行幫手

      刪除
    2. 我度有租管,有啲樓唔可以隨意加租。

      刪除
  10. craigslist.de都會比你免費登租盤廣告
    你度啲租盤似乎都係私人放租,好似無乜大公司營運嘅apartments嘅?

    回覆刪除
    回覆
    1. 大公司營運嘅apartments即係邊啲呢??完全唔知係乜.

      刪除
    2. 即係成個apartment community都係屬於某間公司嘅,所有單位都只租唔賣,日日都會有職員喺度坐鎮,喺辦公時間內你可以隨時去睇樓。
      似乎你度無呢啲apartments

      刪除
    3. 聽你形容,我度似乎冇呢種apartments

      刪除
    4. 係囉,唔明點解無,香港都好似無,香港有嘅係酒店式住宅

      刪除
    5. 似乎係喇,但真係唔明點解呢,點解嘅?點解只得我度興嘅?點解其他國家都無大公司做呢種生意嘅?點解嘅?諗到頭都大埋 :p

      刪除
    6. 只租好難回本嘛。如果冇人租點算?!

      刪除
    7. 我覺得呢個唔係理由,只租唔會好難回本,只不過係無咁快回本啫,長遠嚟講,租可以幾十年後都有錢賺,賣就只可一次過賺錢,大公司做生意唔會咁短視嘅。我度有咁多呢啲apartments就證明呢盤係賺錢生意,所以唔明點解其他國家無囉

      刪除
    8. 又可能係(好似我度咁)有租管,唔可以亂咁加租。見冇得賺就冇人做啦。

      刪除
    9. 呢個理由都仍然唔夠說服力,我度夠有租管,唔可以亂咁加租洛,咪一樣做到成行成市?

      刪除
    10. 咁你快啲去研究吓啦.話唔定諾貝爾經濟學獎係你攞.

      刪除
  11. 瑞士租屋D租客都係要鬥快鬥profile靚, 同埋如果租金係申請人月薪三份一以上,業主係唔會租俾佢架.

    外國人租樓係會難D, 不過如果係外派嚟工作, 有規模既公司都會揾埋agent幫員工揾屋,我個台灣relocate來瑞士既同事都因為咁好快揾到屋租.

    回覆刪除
    回覆
    1. 似乎外國人租屋度度都難咁喎.最近睇HK嘅節目,印巴人喺HK租屋都好難。

      刪除
  12. 回覆
    1. 試過喇。但係好難搵到夾嘅。

      刪除
  13. 原來咁嘅,咁將來想做遊牧民族咪好難。。。

    回覆刪除
    回覆
    1. 歐洲似乎幾難。似係怕外國人唔交走咗佬。

      刪除
  14. 香港有D業主都睇職業同有幾多人住先租架, 唔係全部~

    回覆刪除
    回覆
    1. 最近睇HK嘅節目,印巴人喺HK租屋都好難。

      刪除
  15. 我friend最後都係佢男友在柏林揾到工先租到屋,好大又靚,香港劏房都租不到.柏林真係好livable

    回覆刪除
  16. 講起租屋, 肥人又諗起前業主啦!
    我FD 話前業主周圍唱我地呀, 好嬲呀!!

    回覆刪除

入咗嚟,不如寫幾隻字,留個言啦.