又淘寶

又淘寶開箱喇。呢啲唔使估啦.

口罩盒，香港人應該好熟啦, €1.89. 我唔多鍾意口罩套，因為覺得底同面好易交叉感染.

墊蒸籠用嘅矽膠。未試，唔知啲點心會唔會黐。 €0,94一塊

 搓手液樽仔, €1,18, 貪佢有個勾。因為我試過跌咗樽搓手液，冇得洗手,周身唔自在。

只係貪得意買， €1.25

軟膠四葉草，€1.94 一包，有廿塊。用嚟裝飾門口。
 

可以企嘅飯殼， €1.89

但係背脊有個窿，唔知洗時會唔會入水。

呢個睇過報導話係舊年日本100円店熱賣產品, €2.32。可以用佢開門，㩒掣，㩒touch screen，唔使用手直接接觸。

OK，大家估吓以下呢啲啦.

硬膠 €2.38

 

鈕一粒,有乜好估呢.咁就估吓有乜好處啦. €1.09

一個套， €1.88

有乜功用呢? €3.19

兩條膠棍， €1.38

呢個角度，等你哋難估啲。 €1.44

夾，夾乜嘅呢? 1 set €3.04

短短嘅矽膠條， €0.40

貓一隻，€1.56.  估吓佢可以托乜？

好喇，開估.

壽司蓆。個包裝壓到扁晒。買膠嘅係因為用竹蓆捲之前要包保鮮紙，如果唔包會好難洗。

粒鈕好似pin 咁.

發福咗褲頭扣唔到。加多粒鈕就可解決問題。完全唔需要縫紉。

車內用嘅雨遮套。疑似出口日本嘅倉底貨。

書籤。睇見都覺得搞笑。

睇圖就明有乜用.  佢張底紙印得好精美，應該又係出口日本嘅倉底貨。 

咁啱睇咗一個日本節目介紹100円好物。搵咗啲嘉賓估吓呢條嘢有乜用同試用。見原來都唔易。於是烚隻蛋自己試吓，真係好難碌得靚（醜到我連相都冇影）。.

我好環保（其實係cheap ),唔想買淋花嘅水壺。我只係直接用膠水樽。

啲夾係夾皮㗎。好多時皮單同張皮會走位.尤其睡夢中同張皮搏鬥時.

而我好多時係人蓋皮，瞓喺啲夾上面都唔覺擁。

 紮電線用。

聽講喺日本好hit嘅扭蛋。我只係買咗一隻。見可以托筆，但係試咗， 只係鉛筆先得。買嚟托杉。