惜食

呢個Too good to go我知有咗好幾年。係個平台畀啲餐廳，超市以低價賣啲剩菜。減少食物浪費。顧客係冇得揀，佢畀咩嘢你就食咩嘢。有啲似開盲盒。

最近友人題起佢，而我依家又懶煮。於是單撈個App睇吓有乜筍嘢啦。

我住呢區比較多參與嘅超市，麵包店，餐廳。

第一次就幫襯屋企附近嘅阿塞拜疆菜。

呢度4歐。平！喺超市買合急凍飯普通都要3歐幾。

因為我新手，冇睇到呢間原來要自己帶餐盒。如果餐廳提供嘅話，佢要收兩歐（搶錢！）。

等嘅時候，老闆乘機宣傳。先畀餐牌我睇佢哋有乜食。亦話我知各大外賣平台都可以柯打。

酒店就多數係食剩嘅早餐。屋企隔籬呢間就pack 好晒，唔需另外加錢。

承惠5歐。算係平。

炒蛋，煙肉，腸仔仍然係熱啲。

有晚幫襯一間標榜健康嘅餐廳。呢度4歐。有湯，沙律，四塊麵包，甜品。

個湯好味，沙律新鮮但係冇醬。好在我屋企有。甜品係啲superfood，難食到倒落廁所。

同一晚亦幫襯咗間中式自助餐。諗住隔夜第日帶番工食。佢畀個盒你自己裝。因為係食剩，選擇唔多。大家可以想像個盒有幾大。一盒仔5,50歐我覺得貴嘞。早知係咁唔會幫襯。

有啲餐廳嘅特價餐唔係日日有。有啲筍嘢一出就畀人秒殺。