茶記

最近慕名嚟到奧地利首間茶記，因為睇咗多份報章報導。

呢個係一間小型華裔飲食集團。擁有幾間唔同風格嘅食肆。話說老闆去香港時被茶記食品及速度吸引。引入維也納應該有出路喎。

咁我當然睇吓佢正唔正宗啦。最簡單就係睇吓佢個餐牌。。。伏味甚濃。。。

茶記有西式沙律，中式餃子。。。仲有好多食物名稱係用普通話拼音就當係英文。

某份報導好中肯。話美味有嘅，但係正宗嘅港味呢度就冇份喇。

其實有啲嘢都想試吓嘅。就嚟做試伏器啦。

點咗: 港式檸檬茶，叉燒/ 豉汁排骨雙拼飯。

檸檬茶好有維他檸檬茶嘅味道，可惜超級甜。

豉汁排骨正常。叉燒係叉燒味只係冇色水（可能呢度嘅叉燒醬冇色素卦）。

評語> 冇汁嘅飯，又要噒骨，應該好難會被啲西人接受。

佢要學香港嘅速度，啲嘢好快送到。仲快過我呢邊嘅麥記。

冇香港嘅員工又要快。解決方法我估> 所有嘢都係預先整好（應該係中央廚房）。飲品都係預先入樽。

最後食埋嘅紅豆冰。因為係整定，走冰的。而佢用咗椰奶，味道就唔似嘞。