避暑

8 月 1 第二波熱浪來襲嘅週末。咁啱一早約咗人行山，有大（我第二年長）有細（最細一歲）。

目的地 Naturfreundehaus Knofeleben 唔係第一次去。

之前都係喺山腰出發。今次就喺山腳嘅 Payerbach-Reichenau 火車站行上去。

行咗四個幾鐘，就到時落大雨。可惜攰到跑唔郁，照頭淋降溫都唔錯吖。

當日嘅避暑山莊。

一早一晚呢度係好涼的。要著外套。

預咗冇水沖涼因為佢以前只靠雨水。原來依家佢向附近嘅消防局買食水。

凍水涼兩歐一次，時間好短的。沖凍水，唔使預我。

第二日就落山。

友人之後建議去附近嘅河游水。

冇留好耐，因為有樹蔭嘅位置要過對面河。之後轉去泳池。