此奧不是此澳! (奧地利生活, 遊記, 煮食)

2008年11月9日星期日

六合彩(2)

之前講過呢度有唔同公司出嘅六合彩。可以自己劃凜把或者買電腦飛。例如呢間LOTTO電腦飛有４注，同時可以買埋JOKER。每張六合彩飛都有一個六個位嘅號碼，JOKER就係抽呢個號碼。中一個號碼都有獎。

唔同公司出嘅六合彩

六合彩飛好似超市收據，一張電腦飛＋JOKER 5.30 euro

叉燒飯

呢度好小香港人,想食叉燒?自己整啦。

材料:

『你敢寄』叉燒醬, Schweine Schulter (香港唔知係咪叫梅頭)

作り方：

張豬肉用叉燒醬醃兩日後,放入焗爐。咁就搞店!

叉燒配Basmati白飯

Basmati米

(米:德文Reis, 意大利文Riso。奧地利嘅米通常係意大利入口)

古典音樂原來可以咁難聽

尋晚友人攞到免費飛去著名嘅 Musikverein聽小型演奏會。以為可以參觀黃金大廳Goldene Saal，點知唔入得。唯有返去自己所屬嘅演奏廳Metallener Saal。當晚演奏當代作曲家嘅樂章。古典音樂已經唔係我杯茶，呢個作曲家嘅樂章嘈到死，古典音樂原來可以咁難聽。大家都頂唔住，中場提早yang。

突尼斯(8) – Yasmine Hammamet旅程終結篇

Yasmine Hammamet 係Hammamet新發展嘅渡假區。Lonely Planet 嘅評語係: 你如果唔係住喺呢度嗰啲4 / 5星級酒店，無需黎呢度。

黎到一個好似『Big鬼完』嘅地方食lunch。啲住宅每戶都有游艇泊位。

間餐廳個waiter拎住碟油浸carpaccio喺我身邊騰黎騰去，最終滴咗啲油落我件衫度。點知佢有一件法寶，一枝去油噴劑，油漬冇晒。

海盜船: 提供半日出海團

食飽飽

(picture from the Simpsons comic)

喺香港食飽飽，好自然會ngoor番啲氣出黎(英文burp，唔知廣東話點打)。喺呢度千祈唔好咁做。氣體由體內排出等同放屁。

另一個唔知廣東話點打嘅字' 打C Egg' (英文hiccup)

2008年11月7日星期五

突尼斯(7) – 門口篇

Postcard同guidebook都係咁影。有樣學樣。

突尼斯(6) – Hammamet

Hammamet 嘅Medina 有一座城堡The Citadel (The Borj)。城堡內係民居同紀念品店。嗰度有間博物館Musee dar Khadija (La Medina, BP 328, 8050 Hammamet) 好簡單地介紹Hammamet 嘅歷史。

另一個喺Hammamet 嘅景點係Centre Culturel International D'Hammamet。呢度原本係羅馬尼亞百萬富翁Georges Sebastian 嘅別墅， 1920 興建。最得意見到四人浴缸同舊款美國雪櫃。

The Citadel (The Borj)

Musee dar Khadija

Centre Culturel International D'Hammamet

四人浴缸

雪櫃(左)

懶係pro咁試酒

連續兩日都有得試酒。前日一間書局收咗檔之後(7pm)搞咗個試酒會黎推廣一啲關於酒嘅書。免費參加。冇蝕底，所以喺書局磨到夠鐘。

開始時主講者教大家點樣'渣'酒杯。之後用眼去欣賞酒嘅顏色，用鼻聞酒嘅香氣。張酒含喺口慢慢品嚐。最意外係居然有廿年舊紅酒試。

尋日因工事去咗個啤酒workshop。首先俾你試佢自家品牌2007同2008年嘅啤酒。原來同一牌子唔同年份嘅啤酒係唔同味架。然後就要喺5隻啤酒中搵出2008年嗰隻啤酒。好彩之前學咗點試酒，懶係pro咁，又俾我搵到喎。冇失禮。

BTW，喺外國好難買到奧地利產紅白酒，聽講啲酒都唔夠內銷，所以冇出口。

2008年11月5日星期三

頻頻去廁所可能會破產

德文廁所Toilette 。但係啲人通常只係講WC (德文發音:VC)。初初未慣，有人問 'VC'喺邊，我都唔知佢搵乜。

德文:男Herren, 女Damen。記得第一次去德文國家瑞士，唔識德文，未有預習德文詞彙。問人廁所喺邊，佢指住遠處寫住Damen 嘅地方。見到男廁，心諗Damen = Toilet。跟住去到一間餐廳又要去廁所。當想推門入去Damen 嘅時候，見到背後隻門寫住Herren 。心知不妙，拿拿聲番埋位查字典。

喺奧地利有啲廁所係冇圖示。只係寫Herren/ Damen，或者只係H/ D。有次見過有個遊客企喺廁所門口唔知入去邊個好。仲有奧地利遊客區嘅餐廳廁所或公廁好多時要收錢，20 euro cents至 50 euro cents 。旅行時記住留啲散銀去廁所用。頻頻去嘅話可能會破產。

維也納Karlsplatz地鐵站地下通道內嘅音樂廁所，會有古典音樂播放。唔知方便嘅時候會唔會舒暢啲呢?