叉電叉電再叉電

1月31長征去老地方科隆。但今次貪新鮮，選用電動車。
同人講呢個trip，聽到後都O咗咀。電動車因為始終配套未完善。
因為唔同公司都各自為政，有自己嘅叉電站。要係會員先可以嘟會員卡畀錢。而喺外國就要用漫遊夥伴嘅站喇。
所以出發前做晒準備，寫低沿途啲叉電站.(冇用app,因為我嘅山豬網絡超級慢）。
去到第一個叉電站，插咗電線就大安旨意去食嘢。一個鐘後。。。。乜都冇叉過嘅！！！！原來壞咗連接唔到。自己冇留意。但好urgent要叉喎, 咁跟GPS指示去下一個站啦....
去到搵唔到!!!
OK,去下一個..........唔同網絡供應商唔可以用!!!
於是試吓單撈個app啦。居然得喎.  搵咗最近嘅自己網絡商。去到點知...係掛牆式(如下)。呢隻係超慢的。當時叉滿要等九個鐘呢.

所以決定沿途搵啲快嘅叉電站（開始有啲啲經驗）。有驚無險夜晚八點到咗德國嘅Dillingen渡宿。貪佢呢度酒店附近可以叉電。
2月1嘅計劃係一早叉電，放低㗎車後city tour嘅。點知 。。。。。one and only嘅叉電機壞咗!!!
唯有唔city tour,用僅餘嘅電去下一個可以叉電嘅小鎮Hermaringen啦。
好彩叉到，但係慢嘅。喺呢個乜都冇嘅鎮磨咗一個半鐘，有足夠嘅電去下一個快嘅叉電站。而呢朝另一個景點要放棄啦。

路上見GPS話附近Ellwangen有叉電站，唔係自己網絡都去試試啦。居然叉到呀！仲係快嘅添。有救喇！咁就喺呢度食個lunch，上網plan行程。磨咗一個鐘夠電去下一個快站。

原先打算喺Heidelberg叉，但係又搵唔到部機. 好彩我有幾個emergency plans。最後到咗Dossenheim嘅快機. 叉咗九個字，有足夠嘅電去到科隆。

兩日行程乜都冇睇過,只係叉電再叉電。
喺科隆嘅節目當然又係叉電啦。星期日試咗幾部附近嘅機都唔接受張會員卡。
漫遊夥伴最近又可以打發時間嘅係喺一個mall. 可惜星期日唔開. 咁就星期一, 2月3嚟啦。
呢度部機又係掛牆式，慢嘅。咁就慢慢shopping啦。磨咗四個鐘，有足夠嘅電for聽日用.

友人聽咗我哋呢日嘅經歷有啲擔心，於是帶我哋去佢公司嘅叉電站試試。呢度居然拍卡都唔使就可以叉。友人話可能部機係新嘅，駁咗電但係就未set個付款程式。搵到呢個救星安落晒。

咁回程時會唔會都咁驚險呢??請大家密切留意喇。