蝦仁 嫩滑蒸水蛋

好似係見blog友煮蒸水蛋, 先醒起我都有十幾年冇食過。於是搵食譜啦（主要睇吓啲技巧）。

呢個食譜落蝦。未食過喎。就跟佢啦。

https://www.youtube.com/watch?v=wq8R6c5P_uw

急凍蝦用鹽水浸5分鐘，滰乾。生抽，生粉，麻油各一茶匙，少少胡椒醃醃啲蝦備用。

三隻蛋落少少鹽輕輕打發（儘量唔好打入空氣），過篩。然後落凍滾水（1:1）撈好。
先放蝦，倒入蛋液。放入已滾嘅水蒸，熄火，再焗一陣。最後落豉油，蔥花。

佢話蒸三分鐘，焗五分鐘。當然要睇你兜嘢幾深，執生啦。

啲蝦似蝦餃嘅味。蛋就似食布甸囉。我要求唔高，OK嘅，夠滑。