一雞三味

其實我一雞可以整五味架. 雞骨煲咗湯. 雞翼儲緊中.

一邊雞胸整咗呢個Kimchi雞肉炒飯. 話說前排買咗kimchi粉,玩吓自己醃泡菜.點知紹菜未係時候,未上架.冇得玩.

終於最近見有,即買.個說明話要用蔥同紅蘿蔔,但係都唔知呢隻粉掂唔掂.唔想嘥嘢咁我就冇用. 醃好咗,試食....味道都唔似嘅. 唔食又嘥.突然有個idea用嚟醃雞,整炒飯. 雞肉醃咗一晚好入味. 個炒飯都好好食. 下次都會再醃泡菜整炒飯.

另一邊雞胸整咗T&P 嘅白汁雞肉意. 整白汁真係要好有耐性所以呢個我未必會成日整嘞.但係好好味架.大力推薦.推推推!!!

我有個問題. 個白汁煮極都好稀.但係凍咗就杰囉喎.冇理由係凍食架??

意粉自己當然控制到煮到al dente啦. 但係食得多,有啲懷念茶餐廳淋be be意粉添.

牛油和麵粉嘅比例係 1:1

先用慢火煮溶一湯匙牛油,

加入一湯匙麵粉炒勻,

要炒约 2 分鐘以除粉味.
將三杯奶加熱,

将熱奶倒入煲中, 一面倒, 一面攪

雞脾整乜好? 我呢個T&P fans緊係去佢度搵食譜啦. 佢個檸檬五香雞啱晒,材料有齊.(上上次喺香港帶咗五香粉過嚟).

我個製成品點解同T&P比好似唔係好上色. 我冇大菜刀斬開,就咁成隻食.

味道....太特別.接受唔到添. 哈哈!好少有T&P啲嘢唔啱我口味.

材料:

大雞髀 chicken maryland 2隻

醃料:

五香粉1/2 茶匙

鹽 1 茶匙

檸檬一隻, 皮磨蓉

檸檬半隻榨汁

老抽一湯匙,

紹酒少許

做法：

大雞髀先用老抽, 紹酒撈勻上色, 再加入其他醃料醃約兩小時以上.

入預熱 180C 焗爐, 每面焗約 20-25 分鐘至熟

取出待涼, 斬件上碟,

將焗雞汁撇油, 淋上雞肉即可.