芽菜手撕雞

好耐都冇煮過新嘢,早前見雀后整 芽菜手撕雞.幾吸引喎.我又整我個慳家版先.

慳家係因為我鍾意買全雞自己支解,平啲嘛. 仲慳家嘅係個雞殼仲會有啲肉,以前我只係用嚟煲湯.呢次就蒸咗起埋雞殼啲肉嚟整.

芽菜我呢度都幾普遍,鬼佬超市都有. 但係我只幫襯一間超市,因為佢哋芽菜好乾淨,冇乜根,唔使洗餐C. 不過,去呢間超市都幾遠吓. 都係近近地去買罐頭芽菜算.

食譜有嘅乾蔥,我係冇買嘅. 因為剩咗唔知煮乜好. 所以我用咗洋蔥代替.

煮嘅時候心諗...都係自己食啫,唔使好似雀后咁一層層啦. 所以索性炒埋一堆, 再配意大利tagliolini食,好一個fusion呢.

材料: 芽菜半斤、雞1隻、蒜蓉、乾蔥蓉、薑蓉和蔥粒

醃料: 鹽1.5茶匙、紹酒半湯匙
調味: 頭抽1湯匙、老抽半湯匙、糖1茶匙、麻油少許和蒸雞汁3匙羹
做法: 雞用鹽和紹酒醃半天；芽菜去頭尾用鹽水烚30秒，
撈起瀝乾水份備用；蒸雞25分鐘後焗多5分鐘，
待涼拆肉，將雞肉放在芽菜面；

落少許油將蒜蓉、乾蔥蓉和薑蓉落鑊爆香，
加入預先調好的調味料內與雞絲、芽菜和蔥粒撈埋便成。