乜都講吓

今日乜都講吓

大家如果依家嚟維也納可能有啲失望,因為莫札特修身中.

最近垃圾桶有個告示. 有按金嘅樽請放垃圾桶旁. 可能係唔想拾荒者摷垃圾影響衛生啦.

19同20號有個Das Wiener Einkaufsstraßen Festival (Shopping street festival). 19號呢日去咗Landstrasse八吓.

今年規模細咗. 只有呢檔係新嘢.

森巴女郎,即刻卜去睇.

20號呢個活動喺我屋企附近例牌搞咗個Kürbisfest南瓜節.

今年憑coupon可以有一個免費南瓜. 唔係好食南瓜嘅我都唔蝕底.

有日得鬼閒,去搵以下呢個藝術品睇睇. 

呢幅係一個公屋嘅壁畫. 座公屋係納粹年代起,壁畫描繪納粹黨眼中嘅理想家庭,一家都係金髮.  

呢個黑暗歷史嘅嘢並冇被抺走,只係剷咗個納粹黨徽. 之後搞咗個公開比賽,同佢改一改裝. 

反轉嘅Idylle(理想),意思係呢個家庭望出去好理想,但係外邊嘅人睇係相反.

Blog友介紹食嘅Kiwi Berries. 個皮似食厚皮提子,果肉好甜,唔係奇異果個味. 我呢度125g賣兩歐. 咁啱間超市有自定75折貼紙,又去買pack嚟食.

另一Blog友喺香港買咗一隻奧地利品牌古力. 我之前真係未見過. 搵咗幾間超市都冇. 咁啱喺我附近間賣肉outlet見有,買嚟試試. 味道OK啦. 呢邊賣0.9歐一排.

呢間餐廳有Braunch食.....但係乜嘢係Braunch呢??? 諗諗諗..... 

哈哈哈!串錯字. 係德文口音嘅Brunch. 德國人讀英文好鍾意加個ah音. 而德文串字係有音寫音,所以呢個外來語就串錯咗喇. btw google過,braunch係一個古英文字,即係依家嘅branch.

星期一某超市喺某報紙一定有廣告. 今個星期一見佢呢個廣告有嘢想買喎. 去咗一間唔見,去另一間又唔見(係要佢賣廣告嗰啲乜都冇喎). 冇理由我睇錯吖...

明明寫星期一(24號)開始有喎....... 

咦咦咦! 今個星期嘅星期一係22號喎!!! 咁都有?!!