速遞失件

之前話速遞失件好正常嘅。今次就講吓我個真人真事啦。

話說有份公事文件等住收。預定收件嗰日就不停check住個送件status。等等等。。。網頁話送達。再等等等個OA都仲未拎嚟畀我喎。於是走去reception度問啦。Reception嘅同事們都話冇收過。

（相片與本故事無關）

咁當然問客服啦。回覆係有人簽收咗啦, 仲send埋個簽名copy畀我添。

於是我拎住個簽名去reception問罪啦。Reception嘅同事們話都冇人個簽名係咁嘅。 

死無對證。唯有叫人出多次文件，聽日搵OA開車去攞啦（份件係喺另一個鎮）.

第二朝，OA未出門，份件已喺枱面??? 

原來個速遞將件嘢就咁放咗喺樓下嘅信箱，自己簽收。而秘書只會隔日先去開信箱一次。

故事話畀大家知速遞懶到連上樓都費事（已經係有𨋢㗎喇，冇𨋢嘅樓真係唔可以想像）。

------------------------------------------------------------------------------------

講開啲速遞。如果派件時冇人收，咪應該有張紙貼喺度叫你去邊度攞嘅。問題有二＞

 一> 呢度啲大廈冇看更。生埗人入唔到嚟。咁張紙就會貼喺大廈門外。如果風吹雨打，張紙會唔知去咗邊的。

二> 好多時啲速遞唔知係咪地址盲嘅。九唔搭八嘅地址可以貼咗喺你大廈門。見係隔籬大廈嘅，好心我會貼番過去。唔知邊條街嘅就有得佢㗎喇。

結局當然係冇人領件，件嘢隔一段時間會退番畀寄件人啦。

(如果上門冇人，件嘢會放喺合作伙伴嘅舖頭，等你攞。)