泰國 - Day 9 Ko Phangan 求婚大作戰

 1 月 6 度假屋。

發現泰國好多舖頭都要除鞋。

早餐去我哋附近間德國麵包店。

賣啲德奧常見嘅包。顧客好多都係德文人。價錢當然唔可以話平。

部份團友遲起身。佢哋早餐我就 lunch。去冇幾遠嘅 foodcourt。

之後去租電單車。噚日已經問咗好幾間。價錢都一樣。只有呢間只收按金，唔使收護照。按金 4000 baht，租金每日 250 baht。完全唔使睇你有冇車牌。

呢日我有個大任務。

有人話會喺泰國求婚。要我幫手。

首先佢女友係所有嘢都管（同居關係），所以聖誕前佢已經交咗隻求婚戒指畀我保管。點求婚，佢冇idea。

接到呢個任務當晚突然我有好多靈感。第二朝就出咗計劃書畀佢。詳列優點同缺點。佢揀咗方案一。

知道邊個方案，就去last minute shopping。聖誕過後冇乜呢啲LED 蠟燭剩。去咗四間先買咗 70支。喺屋企試砌，點知唔夠。可惜已經太遲舖頭已經閂哂。於是計畫改變，只砌一個心。中間喺沙灘上寫"你嫁畀我"啦。

喺度假屋附近其實有個位好正。點知友人話太多人，佢會尷尬。咁要即時搵過第個地方。

我建議喺 1 月 6 日，因為係奧地利嘅公眾假期，唔怕唔記得。(女人鍾意記埋啲乜乜紀念日嘛。)

我同一位友人四處閒逛，發現附近一個沙灘日頭都冇乜人，夜晚應該唔會多人。

海灘亦有間餐廳，食飯等天黑就行動。

呢個位砌心心又話怕人多。最後決定喺一個唔顯眼嘅地方。

喺餐廳訂咗位。話畀老闆知會發生乜事。之後嚟到見原來佢已經幫我哋張枱整得靚靚。

男事主等嘅時候話好緊張。

食完飯，我話肚子有問題，要失蹤一段時間。然後就鼠咗去砌心心（漆黑一片，唔使喺沙度寫字啦）。搞掂埋返位後一位友人就話大家喺沙灘散吓步啦。

事後女事主話都懷疑㗎喇，無啦啦話要散步。漆黑中，佢原本以為啲燈光喺啲船發出。之後見我哋打哂燈影相同拍片就知發生乜事。

佢心諗男事主應該唔會喺泰國求婚㗎。因為check 過所有佢嘅行李都冇訂婚戒指，銀行戶口又冇大額支出。（男事主每日儲起少少cash。偷咗女事主嘅戒指度size。然後返工 lunch 嘅時間去買戒指）

之後一團人繼續喺一間bar 慶祝至兩點。（咁啱揀咗坐喺奧地利國旗底下。）