突圍而出（巡）- Regensburg

大家都知奧地利封城啦。咁啱因為清假，攞咗正正係封城嘅時間。但都冇影響我出巡嘅計畫。因為我嘅副業好易整到出差證明。

目的地德國。德國列咗奧地利係疫情高風險地區，入境前要網上填申報表，申報最近十日去過邊度，嚟緊十日會喺德國邊度做隔離（歐盟打齊針嘅人豁免隔離）。

11月23過境，奧地利呢邊冇人check你乜原因封城仍然外出。德國呢邊亦冇check你有冇歐盟健康碼。掂行掂過。

嚟到Regensburg 。

原先諗住嚟行吓啲聖誕市集。點知巴伐利亞洲喺我出發前一日宣佈因為疫情嚴峻，取消呢個州啲聖誕市集。

舊城嘅Christkindlmarkt 市集其實已經搭好晒。

Town Hall 嘅聖誕樹。

Lucrezia-Markt 聖誕市集計畫三日後開。但係咁嘅款，應該都唔會開嘞。

哈哈，呢位仁兄係咪太凍呢?

Kloster Sankt Emmeram上次嚟 (七月）啱啱摸門釘。

今次補番數。

好彩仲有個私人搞嘅聖誕市集Romantischer Weihnachtsmarkt 開*。入場 8,50歐，但係門票已經售罄。

*註＞原來主辦單位同政府對簿公堂。今日嘅新聞稿話未有勝訴前，聖誕市集一樣要暫停營業 （好彩我早一日嚟）。

地點係Thurn und Taxis 嘅宮殿。Taxis就係第一位搞的士生意嘅貴族。

市集只准打咗疫苗同肺炎康復人士入內。

有一part係for 小朋友玩。

市集賣嘅嘢都係嗰啲啦。冇影相。

天氣凍，想食啲熱嘢暖吓胃。熱嘅甜品其實我麻麻，但係冇乜好揀。

炸蘋果厚片配蘋果蓉。最好食係個兜（威化餅）。

可愛。

行去宮殿嘅中庭。

呢度賣熟食居多。

今日，11月24仍然喺Regensburg。

碼頭呢邊第一次嚟。

呢日計畫去巴伐利亞洲歷史館Haus der Bayerischen Geschichte 參觀。

點知喺門口畀實Q攔住。原來呢日開始巴伐利亞洲又加強防疫，去博物館除咗健康碼，仲要有陰性檢測證明。

冇，咁唔去囉。

咁啱經過Tourist Information，問吓邊度可以做檢測。原來附近有PCR Test, 結果有效48小時。

睇睇，要錢的。一次接近76歐。仲要3至5個鐘後先有結果, 。

咁就唔去博物館嚕。

其實仲發現有快速測試，要預先登記先可以做。

返到酒店睇吓資料，原來德國人免費，外國人就要接近15歐，證明有效24小時。