科隆雜記(下)

有一日我番舊居附近嘅唐人雜貨舗,因為我淨係知嗰度有港版出前一丁. 今次去到發現啲貨過期,歐洲唐人雜貨舗好多時都係咁, 我習慣咗第一時間睇有效日期.

兩手空空出番黎,跟住行去冇幾遠嘅 冧樓現場. 大家記唔記得呢件事呢. 依家嗰度仍然封咗路. 附近有個古蹟已經搬走咗. 對面間學校我諗已經唔用.

喺朋友屋企見佢有PG tips. 記得blog友DaＤａ話呢隻似港式奶茶。於是叫朋友俾我試飲。係好味喎。飲完個口唔澀。問朋友佢係邊度買啦，點知佢話英國。。。突然醒起科隆有間英國雜貨舗。去睇睇，真係有呀。１０　ｅｕｒｏ一盒。仲買咗英國版可樂同啫喱粉。奧地利唔見有啫喱粉賣架。

行街見到有間Ｓｕｓｈｉ　Ｔｅ，以為係Ｓｕｓｈｉ　Ｔｅｉ啦，用同一個ｌｏｇｏ喎，睇真啲，冇ｉ嘅喎。老翻?!

喺奧地利同德國好多時都見到舊車

呢架幾型。望吓入面，原來係腳踏車黎，但係後面有車牌架。

朋友工作關係，某日去參觀德國名牌“金屬盒“ 嘅工場。個工場外表同佢個招牌“金屬盒“ 一樣樣架。

因為入面唔俾影相，唯有齋ｕｐ啦。首先係貨倉，一箱箱嘅貨ｐａｃｋ咗喺度，舉頭一望，有一箱係運去香港架。　跟住經過保養部，一個個爛盒等緊維修。　之後就係生產部，一塊塊裁好嘅金屬片由機器摺曲，再由人手上螺絲或窩釘。喺工場見到啲一箱箱ｍａｄｅ　ｉｎ　ｔｈｅ　Ｐｈｉｌｉｐｐｉｎｅｓ嘅嘢，原來係其中嘅部件。所以我覺得佢唔係Ｍａｄｅ　ｉｎ　Ｇｅｒｍａｎｙ，只係德國裝嵌。喺度開工嘅工人唔多，慢工出細貨，唔怪得賣咁貴啦。

科隆火車站係我第一次見有咁樣嘅ｌｏｃｋｅｒｓ。

因為德國乜都要按樽，按罐。咁就同香港一樣有拾荒老人。喺火車站會見好多。有啲好ｐｒｏ，帶埋電筒照垃圾桶。