加人工

奧地利嘅人工除咗最低工資嘅規定, 仲有唔同行業，工種，年資都有規定嘅月薪。即係跳槽去另一公司（同行業），人工係唔會一齊跳㗎。

而加人工都係有規定。所屬僱主聯會同工會達成協議，就會有以下呢個新一年嘅稅前人工列表（用我呢行 - 旅行社做例子）。

呢個安排都好嘅，唔會話啲刷晒鞋嘅會加多啲。又唔會話同事要出位就踩低人。 辦公室政治相對冇咁陰險。

而最底咁低人工嘅係乜呢?

呢度興見習生制度，係合法嘅廉價勞工。學生們學完理論，就要去實習。通常佢哋仍然有父母養。唔會話人工少生存唔到。
 

另外另外，大家都知通脹高企啦。今年僱主規定要發放通脹津貼。我呢行就規定每月 35歐或儲埋喺出雙糧時發放。註＞法定每年兩次雙糧。