Wir sind Wien

Wir sind Wien 呢個活動回歸喇。呢個係喺6月維也納22個區巡迴演出嘅免費文化活動。

6月5去咗我住嗰區。 

首先有個戶外攝影展。主題Almost。疫情期間唔可以出遊，攝影家就喺維也納發掘一啲同外國差唔多嘅風景。

似唔似香港同東京？

右邊嘅話似北京嘅CCTV大樓喎。

表演因為限制觀眾人數，所以今年要一早網上攞飛。

錯咗衣著，夜晚好多蚊螆降落喺我隻腳。

表演者係MUK嘅學生（維市也納音樂同藝術大學）. 攞飛時以為係音樂表演。原來係當代舞蹈團。。。。第一組一出場就喺地下抽晒筋。。。中伏！

樂器又騎呢。

入場睇嘅戶外都要戴口罩。

眼見好多位都吉咗。唔知係咪日頭天氣好,好多人去咗第二度。

最後嘅表現有現場音樂伴舞。

表現約一個鐘。

在場睇嗰時要戴口罩。

6月6 冇攞飛。諗住喺外圍睇, 因為舒服啲唔使戴罩。

表演係Wiener Symphoniker。

其中一位仲要唱埋。曲目係拉丁美洲歌。麻麻哋，冇睇晒就返屋企開飯。

6月15 呢日已經改咗唔使戴罩。

 入場要有3G證明(德文)。呢位仁兄冇，即場當面撩鼻，阻住晒。

 話人阻住晒。其實上一場未完。早咗嚟，就喺外圍睇睇。

又係MUK（維市也納音樂同藝術大學）嘅學生。今次係唱歌劇。好睇好多。

到我攞咗飛想睇嘅表演喇。Wiener Symphoniker演奏嘅West Side Story嘅音樂。但係啲節奏改咗啲，唔係好認得啲歌。

6月17 去睇一位女藝人嘅演唱。

啲歌好似讀歌詞咁(話係奧地利一種歌嘅style喎)。我唔識欣賞嘞。

唔知係咪呢個社區太多元文化（文化差別大）。外面圍觀嘅街坊好唔尊重個表演。有人發表偉論。有小朋友喺度瘋狂恥笑。有人扮表演者嘅唱法。。。