2021年12月31日星期五

2021年大事回顧

年尾喇,嚟個大事回顧先。

話說我係喺疫情重災嘅行業,依家仍然係政府保就業計劃中嘅一員。每週需工作平時10% 嘅工時,人工只係減啲啲 (公司只支付10% 嘅人工,政府津貼餘下。條件係公司唔可以炒人。)

(網上圖片) 

但係喺十月尾時,百年一遇,我需要喺假期,夜晚,週六,週日開工。 

奧地利勞工法例 >假期,星期日,夜晚8點到朝早6點人工雙計。星期六下晝一點後時薪多50% (各行業會有唔同)。到十一月中check工時月結時發現喺嗰幾日冇跟平時人工雙計噃。

咁問個掃把啦。佢話我哋係保就業計劃嘛,平日已經返少咗工,假期呢啲唔會畀多啲人工你㗎。 

本地人覺得理所當然嘅嘢,喺外國人眼中就覺唔妥。

我呢啲識鑽法律罅嘅香港人會諗。。。如果我係呢行嘅老闆,因同啲客有時差,文化差異關係,就會叫部份員工假期,週日,夜晚先返,唔使補水啦。冇奶油奧地利保護員工嘅政策會差過香港格。唔信!

我斯文人唔同掃把拗。於是email 問工會。回覆當然係我啱啦。補水嘅法例依然存在。

撻個回覆畀會計部睇。會計部同意畀番有關嘅OT錢。解釋話月結嘅系統冇預計有人會喺保就業計劃期間OT。

但係我嘅同事都同我一樣有OT喎,似乎冇人出過聲,咁我要為佢哋出頭啦。Email 畀掃把個掃把話佢知咁咁咁。

掃把個掃把冇回應,只係我被掃把照肺。佢話全公司係得我一個追討OT錢。其他同事都好感恩公司保留到個職位畀佢哋,所以唔會同公司計較呢啲錢。嘩!咁奴性嘅說話都講得出。我仲以為自己仲喺香港添。

之後問咗一個同事係咪同意咗做義工。佢話冇喎。有OT錢佢當然要啦。

之後再email 畀掃把個掃把,指出掃把嘅胡言。如果我係佢個位,我會點做點做。亦叫咗相熟嘅同事做佢哋應做嘅嘢。

我好似變咗搞事份子添。遲啲可能喺公司被消失。


30 則留言:

  1. 你好想食燉冬菇。會唔會因小失大呢?

    有工會撐腰係唔同啲。

    Happy New Year 2022 😁🎊🎇🎉

    回覆刪除
    回覆
    1. 咁又冇奶油被剋扣工資㗎。
      Happy New Year!

      刪除
  2. 祝新年快樂!🎉
    你都好勇..

    回覆刪除
    回覆
    1. Happy New Year!
      睇唔過眼掃把誤導同事。

      刪除
  3. 以你為榮👍
    新年快樂🎉🎊

    回覆刪除
  4. 你冇做錯!
    好多香港人就係太鵪𪂹.

    回覆刪除
    回覆
    1. Happy New Year!
      香港咁做一定被人炒。

      刪除
  5. 嘩!你呢個回顧好精彩呀!就算追討成功會唔會有後遺症架😅
    Anyway,新年快樂

    回覆刪除
    回覆
    1. Happy New Year!
      呢啲係僱員權益,唔理得咁多。

      刪除
  6. 新年快樂!
    嘩!果然好勇,連掃把也咁篤埋,勁呀!佩服佩服!

    回覆刪除
    回覆
    1. Happy New Year!
      其實西人嘅階級觀念冇咁強。佢做得唔啱當然要出聲。

      刪除
  7. 你辛苦啦。
    祝你身體健康,新年快樂。
    我們新曆過年啊。

    回覆刪除
    回覆
    1. 新年明けまして おめでとうございます。

      刪除
  8. 祝你:新年快樂!身體健康!

    回覆刪除
  9. 祝新年快樂 事事如意
    好多掃把都會當左間公司係佢咁架

    回覆刪除
  10. 你係疫情的重災區行業,真係要保重,人在他鄉有乜事冇咩保障...

    回覆刪除
    回覆
    1. 我已經係本地人嚟㗎喇,乜保障都有,唔使擔心。

      刪除
  11. 好型吖你!
    但换作係我,我都會出聲(我阿頭就成日俾我嘈)... 畢竟係自己應得嘅~

    回覆刪除
    回覆
    1. 係囉。無理要求就話啫。呢啲係我應得㗎嘛。

      刪除

入咗嚟,不如寫幾隻字,留個言啦.