咕嚕雞球

新認識一位法國人,禮拜叫埋佢一齊開飯,吹吓水.但係煮乜佢食好呢?

都係穩陣啲煮係鬼鬼都食嘅咕嚕肉啦.不過我以前煮啲咕嚕肉一啲都唔脆,煮過兩三次已經放棄咗.
咁啱最近見如月整咕嚕雞球.即刻偷佢師啦.

炸起真係脆喎.但係可能我用啲汁撈得太耐,淋咗好多.快快影幅相上碟去.

[材料]

雞扒一塊，罐頭菠蘿一罐(小)，青、紅燈籠椒各一隻

[汁料]

菠蘿汁5湯匙，茄汁3湯匙，喼汁2茶匙，生抽1茶匙，生粉3茶匙

[醃料]

生抽2茶匙，酒1茶匙，糖半茶匙，薑汁1茶匙，麻油及胡椒粉少許

[炸料]

蛋白一隻，麵粉一碗

[做法]

1. 雞扒解凍，切大件，加入醃料醃1小時以上或過夜。

2. 菠蘿切大粒，青紅燈籠椒去籽切方粒。

3. 雞粒去掉多餘汁液，蛋白略拂加入與雞粒拌勻。

4. 在麵粉上灑上少許椒鹽拌勻，把雞粒蘸滿麵粉，放入已燒熱之油鑊炸熟，撈起，瀝乾油份。

5. 當全部雞粒炸好，待油再次燒熱，將雞粒再回鑊炸多一次，撈起隔油。

6. 起鑊，爆熟青紅椒，加入菠蘿粒及雞粒兜勻。

7. 最後加入汁料煮至杰身即成。

[小貼士]

~ 雞粒要回鑊再炸一次才會脆口。