差啲食錯藥

歐洲係醫藥分家大家應該都知道。
早前老人家嘅我去睇醫生順便攞藥方。 疫情開始後藥方會email到指定藥房。親身喺醫生度都係冇實體藥方到你手。

最近呢個安排進化咗可以去全國任何藥房，唔使預先通知，只要你醫保卡opt in咗其他人可以睇到你病歷就可以。我就opt in咗，因為我覺得如果喺街暈咗，醫院嘅醫生可以即刻知我有乜暗病嘛。

另一個常見嘅情況係醫生開某牌子嘅藥，好多時藥房冇貨，問你其他牌子好唔好。

呢一日個藥劑師就畀咗兩盒唔熟識包裝嘅藥過我，我以為係換咗牌子定包裝，而個藥劑師服務唔好，冇話我知啫。

但係其中一盒個名好似未見過（我唔記得我啲藥名的），咁我就問個藥劑師啦。佢話係胃藥嚟。。。。我冇食開胃藥個喎。唔知係咪醫生度個reception寫錯藥畀我呢？因為我唔知自己食乜藥，唯有返屋企對吓啲舊藥啦。

一睇，兩盒都唔係我要嘅。想send email向醫生投訴之際，忽然見收條上嘅保險號碼唔係我嘅！！

藥劑師執錯藥！當然返去換藥啦。藥劑師話佢明明係key咗我個號碼㗎。

我懷疑個系統唔係100% search個保險號碼，只係彈個類似編號嘅藥方出嚟，而個藥劑師又冇再double check。
 

註＞一盒藥(30粒)自付費係6.30歐。