疫情新聞

講吓奧地利疫情新聞先。

大家都可能知我呢邊下星期去超市規定要戴N95啦。21號開始各大超市以超低價 €0,59 一個出售。政府同時宣佈呢啲罩呢半年會係免稅。

散裝每人限買五個或每人限買一pack十個。但係第一日已全部售罄。超市話要等下星期返貨先有。

咁買唔到口罩係咪唔可以去買餸呢？法律專家話如果有證明你有買口罩而只係未有貨，你係可以戴普通口罩嘅。

我覺得政府推出新措施前好似冇考慮過法例生效前係咪所有人都會買到口罩。

雖然封城，學生home schooling。但係學校依然開門，方便啲父母都要外出工作可以擺啲仔女喺學校。

據統計，40%嘅學生都選擇返學。減低咗封城嘅效果。

因為新嘅社交距離要求，可能多咗人工作時要戴罩。有人動議僱主要每三個鐘畀一個十分鐘嘅mask break。呢個break唔代表個員工唔使do，只係話唔使戴罩啫。

僱主聯會就話要所有僱主有共識先可以實行。 

另外多咗人WFH，但係未有有關嘅法例。例如WFH時受傷，算唔算工傷呢？僱員喺屋企因開支多咗（用多咗電，開暖氣），呢啲開支可唔可以claim番稅呢? 所有仍然討論中。

話說自願性全民檢測時係搵軍人幫手嘅。據報某檢測中心某𡃁仔軍人擅自攞咗檢測人士嘅個人資料，然後喺fb溝人。

呢位兵哥真係低低地。

最新鮮熱辣嘅就係呢度新聞都有講香港封區。