疑似黑店

早前喺屋企附近嘅牙醫中心做例行檢查（醫保包）。

背景資料＞我左右兩邊最後嘅大牙因為杜牙根後隻牙裂咗，所以剝咗。

（網上圖片，同以下嘅醫生無關。)

醫生＞你啲牙好好吖。只係後面隻牙要換咗啲填充物。另外你合埋口後面會有個窿。我建議你造番植牙，等上面隻牙有承托，唔會慢慢跌落嚟。 同時建議你洗牙啦。洗牙同補填充物可以同時做。
我＞植牙醫保唔包個何?
醫生＞唔包㗎。一隻牙2000歐。洗牙120歐。補牙睇你乜物料啦。
我＞白色。
醫生＞65歐。
我＞你唔可以依家補填充物先咩？
醫生＞洗乾淨先補得。
我＞咁我諗吓先。
醫生＞我可以依家同你book洗牙喎。
我＞我冇帶schedule嚟。唔知邊日得閒。你哋預約都好易啫，打個電話就得。我之後約啦。
醫生＞係呀。我哋預約好方便㗎。

我嚟呢間因為近屋企。而我去開嗰間畀我嘅時間通常都係晨咁早七點。

以前嘅牙醫都冇講過話啲牙冇承托會跌落嚟。同埋以前冇洗牙都同我補牙啦。而呢度洗牙比以前貴一倍。 

以上種種原因，我覺得呢度係黑店。大家點睇呢？