電子書經驗

終於要跟上時代嘅步伐，買咗電子書。

只因以下呢一本好幾年前出嘅書，似係絕咗版。硬皮裝仍然有得賣但我唔多鍾意，而袋裝版只有"熱帶雨林" 話佢有得賣。 落咗柯打，等等等，延期再延期。最後取消埋我嘅訂單。

追開呢個系列，唔睇好似吊癮喎。而"熱帶雨林" 可以買電子版。咁就考慮買唔買一本電子書閱讀器嘞。

閱讀器除咗"熱帶雨林"出嘅 ，其實呢度仲有其他牌子可以買, 但係只支援其他本地德文網上書店。

最後決定幫襯"熱帶雨林", 因為佢德國網站（我喺奧地利佢會自動帶我去德國網站）嘅英文書都幾多。心諗仲可以去佢日本同中國網站買贏（我實在太天真了）。 

部機分別有有廣告同冇廣告版。當然有廣告部機係平啲啦。

而廣告只出現喺開機時。可以接受。

部機我選擇睇英文指示，咁佢就內置咗英英字典。睇書時有字唔識即刻可以查，仲會問埋wiki。好方便。 

想買其他國家嘅書，網上教學可以改登記地址去其他國家就可以幫襯當地"熱帶雨林"網站（不包括日本同中國）。我試咗改去美國，成功單撈咗本免費書。

另外買咗本德文漫畫睇吓啲質素。

亦單撈咗本免費彩色漫畫。當然轉咗黑白嘅電子書就好難睇啦。

咁日文書點買呢？你係需要用另一個電郵同電話號碼設立帳號。所以係唔可以聯繫你已有嘅電子書。

嘗試買本最平嘅漫畫。單撈時係需要有電子書或者佢自家嘅免費app。喺app入面嘅書係唔可以轉落電子書入面。咁就只可以用電腦，平板或者手機先睇到喇。（如果有人知點轉，請指教。）

中國"熱帶雨林" 嘅書好似只有簡體字。但係美國網站有Kindle繁體中文電子書店。

https://www.amazon.com/s/ref=lp_7735160011_nr_n_2?fst=as%3Aoff&rh=n%3A133140011%2Cn%3A%21133141011%2Cn%3A154606011%2Cn%3A7735160011%2Cn%3A18327575011&bbn=7735160011&ie=UTF8&qid=1559111244&rnid=7735160011

唔係所有中文書都有。嘗試搵誠品暢銷書中嘅一本香港嘢係冇嘅。

想買嗰本有。再睇睇德國網站，亦有，用歐元結算，當然幫襯番德國啦。

以後會唔會再買紙版書呢? 

我其實幾鍾意聞書香。如果電子書會噴埋書味嘅香氛咁我就永遠電子化啦。