2022年5月26日星期四

飯煲

初初嚟維也納時喺香港帶咗個飯煲過嚟。可惜好N年前壞咗要喺呢邊買過一個。

當時喺廉價超市買咗呢個。

用咗冇幾耐就出現問題,佢好多時都滾瀉。但係個蓋唔可以拆出嚟洗。次次煲飯都抺C人。
於是每次去電器舖,中超都會留意吓有冇符合我要求嘅飯煲賣。可惜個蓋可以洗嗰啲係遠古時代玻璃蓋嗰種。
光陰似箭,日月如梭,N年後終於畀我見到佢。 只有粉紅色都照買。

有唔同米嘅programmes,仲有延遲煲飯功能。 

最重要個蓋可以拆出嚟洗。
咁普通功能嘅飯煲承惠100 歐。。。超貴。。我終於明白點解移民嘅人要帶埋個飯煲喇。
 
舊嗰個諗住拎去明愛嘅二手店啦。點知疫情關係,佢哋暫停收煮食用嘅家電。

26 則留言:

  1. 物離鄉貴。 煮飯咁容易都有困擾。唉!

    回覆刪除
    回覆
    1. 西人有幾多會煲飯吖,所以飯煲選擇唔多。

      刪除
  2. 我帶來的電器只有電飯煲同麵包機。

    回覆刪除
  3. 咁貴嘅,我去年買,蓋可拆,有煲粥,煲湯,返熱,自設時間的功能才£9.99。

    回覆刪除
  4. 通常。。。去留學的
    都會帶個電飯煲!

    回覆刪除
  5. 以前係Sogo見過, D飯煲幾千銀都有架

    回覆刪除
  6. 我最近都想買個飯煲,因為用緊呢個有D黏底!鍾情在日本生產嘅,但貴!

    回覆刪除
    回覆
    1. 阿媽年代個個都話係要買日本貨。

      刪除
  7. 使鬼買電煲,蒸飯就一樣效果,有煲有碗就得,我用開Mixing bowl蒸嘅,你睇我地成日搬嚟搬去都食到飯。我地都從無用過電飯煲,港女同學送咗個比我地,我地都係放係倉度無用過。當然,要煮多人份量嘅飯就要用電飯煲了

    回覆刪除
    回覆
    1. 我都識用個煲煲飯嘅,但係要睇火,煩囉。

      刪除
    2. 試吓好似我咁用不銹鋼嘅Mixing bowl,好似酒樓蒸盅頭飯咁,唔使睇火,過晒龍都無問題,我連隔水蒸架都唔用。只係試下睇吓熟唔熟,唔熟就繼續,如果經常煮開相同份量,時間都係差不多。因為我現在經常移動、或早前旅行咁,好方便

      刪除
  8. 你唔識上網買咩,乜都有啦

    回覆刪除
    回覆
    1. 我睇過啲網店,睇唔到個蓋可唔可以拆出嚟。

      刪除
  9. 啱啱先係日本城買,豐澤個D又貴又多功能

    回覆刪除
  10. 嘩!超貴喎,咁少功能都100歐,王子叫家人在HK寄個去比你好過啦,再不係叫佢地帶貸...哈哈哈.

    回覆刪除
    回覆
    1. 寄嘢過嚟要郵費,呢邊再要收銷售稅同入口稅,可能最後價錢都差唔多。

      刪除
  11. 而家d電飯煲太多無謂功能!

    回覆刪除
  12. 我鐘意簡單,仲用緊 N 牌子經典 (鋁) 蓋煲分離個款嘅飯煲,亦無唸住换新款。都跟咗我十幾年,希望佢平平安安,長命百歲喇 :P

    回覆刪除

入咗嚟,不如寫幾隻字,留個言啦.