2021年4月4日星期日

終於攞到

以下紀錄我嘅經歷,會比較長篇。敬請耐心閱讀。

話說我用假英國人身份喺呢度住,都冇諗過入藉。到英國脫歐談判,當時英國人喺歐盟嘅居留權有好多未知之數,於是的起心肝攪入籍。

考德文,入籍試 <內容乜都有啲如有奧地利歷史,政府運作(三權分立之類。對舊香港人嚟講唔難理解),歐盟,維也納政務,景點> 難唔到我呢個資質聰敏嘅。哈哈哈。 最難搞就係啲官僚主義。最終歷時兩年先喺舊年十月攞到。

首先用咗最多時間整嘅係香港嘅良民證。香港警方要有移民申請先會處理。而我呢啲已經住咗喺度嘅邊使移民申請呢?好彩駐香港嘅領事館可以出信證明我需要呢個良民證。同一時間就喺呢邊警署打指模寄番香港搵人幫我搞。 

指模嘅表格因為係德文。我決定喺香港先譯英文。香港嘅領事館有啲翻譯公司嘅建議。翻譯公司譯好咗再要求佢哋去民政署宣誓所譯嘅嘢係真確。之後連同所有文件費用交到警署。

收到良民證後,安全起見,再到高等法院加簽。證明呢個良民證係真嘅。當然又有費用啦。

有見香港翻譯都唔平。於是諗住喺呢邊搞。 喺我屋企附近政府指定嘅傳譯員話佢有太多job,唔做我生意。冇辦法,交咗張良民證先啦。處理我畸屎嘅職員話有英文,唔使譯啦。原先佢以為我份嘢只有中文。。。。

十月攞到其實係我投訴先得咋。又話說問咗一位熟識政府運作嘅人士, 佢話資料齊嘅話六個月內需要有申請結果。咁唔怪之每次就到六個月就通知欠乜欠乜。。。。原來係搵藉口拖。 

對香港人嚟講最不可思議嘅係投訴要收手續費30歐先。

收到投訴好快就話批咗喇。約見解釋因為lockdown,澄清脫歐之後嘅安排blah blah blah, 所以要處理咁耐。然後交帶最重要嘅手續(交錢,約1000歐)。

因疫情,冇咗歡迎新奧地利人嘅入籍儀式。國籍證書郵寄到屋企。而之前我嘅歐盟人居留證書要交回。

奧地利不承認雙重國籍。有關當局話會自動通知英國取消我嘅英藉,唔使我自己去搞(已經搵晒資料點去取消)。

新奧地利人因原本嘅姓名難讀,可以喺兩年內提出改名要求。我就決定全程投入做奧地利人,改名換姓。

改名換姓要作文解釋原因。聽講話德文冇嘅名係唔可以改, 而我又想用我一直用開嘅英文名喎(香港身份證冇),於是上網check,話奧地利有大約60人係呢個名。有人用開,咁應該唔會reject我啦。姓我就加多個字母,變咗一個德國人姓氏。而發音係跟我中文姓氏(德文發音)係一樣嘅。(住咗咁耐,只有一次有一個人知我係英籍,用咗正確英文發音稱呼我)

當然又因為疫情要等啦。舊嘅身分證因為等等等都等到過咗期。變咗無證人士。(身分證奧地利唔係一定要有。所以等改埋名先去整。)

新名批咗又要錢啦 (total約70歐) 。名同姓各自有費用。但就冇交代我要之後做啲乜。

某日去睇醫生,職員用我個英文名稱呼我。啊!原來自動改咗醫保紀錄。於是問改名嘅部門仲有啲乜都係自動做啦。原來戶籍登記都係嘅。。。。。。

點知戶籍證明同張新嘅醫保卡個名只係改咗一半(都預咗西人做嘢乸西)。 又要等佢 改番好先可以搞銀行嘢。

信用卡,提款卡要改啦。信用卡又係只改咗一半(係咪加咗一個字母係咁難睇得出嘅呢?住得耐EQ都變得好高)。

啲紀錄無誤先去搞護照同身分證。又因疫情,網上預約要兩個星期。

大家都知整證件嘅嘢需要你最updated嘅相㗎啦。而個職員居然同我拗我張相係舊嘅,因為同醫保卡嘅(黑白)係一樣喎。我凍齡個樣當然冇變啦!!!最後畀佢搵到啲嘢reject我。話我幅相唔靚, 好似冇乜墨。咁又真嘅,明顯見到有一條條直線。於是佢出咗份證明等我可以去claim番即影即有嘅錢, 6歐 (退款非常之快,直接入戶口)。

再約又要兩個星期後。 呢日同我辦手續嘅居然用咗成個鐘有多。似乎喺佢哋電腦資料度冇我呢個新奧地利人。兩個人一齊研究點入機。。。。政府工效率其高。

護照應該係掛號寄到屋企。要出示有效身分證明文件簽收。。。。咁我問佢,我冇證喎咁點呀?佢先恍然大悟,提議我親身攞。

西人做嘢, 真係要問佢多幾句。交咗錢(total 130幾歐)佢想我走之際,我問佢咁我點知幾時嚟攞呢,係咪有信通知?佢又好似如夢初醒,話 "係喎,我同你make個appointmant先(疫情乜都要有appointment)" 。。。(唔問佢可能會因冇預約攞唔到。。。我EQ高,我EQ高。)

(護照內頁比較悶蛋。只係奧地利九個州嘅州徽。)

 

註>護照免簽地,奧地利排第九多。以我睇應該叫第五。

 護照款式除咗正常嘅,仲有其他四款。


30 則留言:

  1. 恭喜你正式成為奧地利人,要住幾耐先可以申請入藉呢?

    回覆刪除
  2. 恭喜恭喜🎊,過程雖然有點複雜,但有好結果,應該賀一賀佢囉!

    回覆刪除
  3. 你咁耐心搞入籍,當然要耐心睇喇XD
    呵呵.....EQ高EQ高嘅香港國王子成功做咗奥地利王子:P

    回覆刪除
  4. 花盡王子心思、心力交瘁才獲得嘅特甜成果,要揾多P功能性刺激活動去慶祝吓。

    散慢嘅人民工作態度、工作流程缺陷性甩漏,推算出近半個世紀西方國家發展遠遠落後於中國嘅原因,自由民主、資本主義並不是最好嘅國家體制,唔好硬迫中國去跟隨佢哋屁股走。

    回覆刪除
    回覆
    1. 冇民主係就係政府運作可以好快,但就唔得民心。
      共產主義原本理念係人人平等,但係喺某啲國家就邊咗質。

      刪除
  5. 乜你唔係改辛普森,海綿寶寶咩,咁出名一定一次過入晒機啦
    恭喜王老子正式成為奧國人,唔同色護照有咩分別?

    回覆刪除
    回覆
    1. 外交護照,政府因公護照,冇國籍護照,仲有一個唔記得係乜。

      刪除
  6. 幾經波折…終於
    做個真真正正奧國王子了!
    哈哈!

    回覆刪除
  7. 恭喜晒喎,正式有個名份啦. 哈!
    咪要改名奧國王子名正言順居於奧國而不用再隱居囉.哈哈!

    回覆刪除
  8. 恭喜王子成為奧地利人~~
    我個醫保卡都係攪左兩年先攪番啱
    王子, 想請教, 你個良民證係遙距咁攪? 因為呢度個groupD人成日話要返香港至攪得掂

    回覆刪除
    回覆
    1. 官方資料係可以郵寄辦理。但係我個情況係領事館封信要人去拎同交錢。所以我遙距搵人幫我拎同出支票。

      刪除
  9. 可名正言順享有奧國福利﹖

    回覆刪除
    回覆
    1. 係呀。但係我未知有乜福利只係奧地利人先有。

      刪除
  10. 你晨早就要搞喇
    唔使兩頭唔到岸
    而家做咗華僑咪幾好

    回覆刪除
    回覆
    1. 08年到而家成十幾年喇
      真喺好長時間
      人生有幾多個十年

      刪除
    2. 上次你返香港
      同你去尖沙咀食飯間餐廳都執咗多年

      刪除
    3. 之前見可以喺度住咪懶懶閒囉.
      香港啲舖頭,尤其係餐廳摺得好快.

      刪除
  11. 見你都住咗好耐奧地利,現在終於入籍到~~
    咁你有冇預先溫下當地歷史呢?!!

    回覆刪除
    回覆
    1. 其實早幾年已經可以搞,只係自己懶懶閒。
      考之前佢派咗一本書畀你自修。考嘅其實係啲基本知識,我去開博物館唔多唔少都學咗啲。

      刪除

入咗嚟,不如寫幾隻字,留個言啦.