2021年4月18日星期日

市場調查超市

早前終於去咗呢間要入會嘅超市買嘢。

呢間超市係畀啲新貨品測試市場反應嘅, 每月都會有新貨上架,睇資料話已經開咗三年㗎喇。佢只收約1500個會員。

首先要登記,揀選年齡組別,家庭人數,有冇小朋友同寵物,家庭收入。 如果你呢個組別(依照奧地利嘅人口結構)有測試嘅空缺,就會電郵通知你可以畀錢入會。

會費我揀咗六個月,每月15歐,要預繳六個月。之後就可以每個月攞價值55歐嘅嘢。 會籍到期就要等有冇空缺,唔會自動續。
 
入店前要打開個app,開藍牙。聽講亦會調查埋啲貨品吸唔吸睛,你有冇停低睇之類。
如果手機網絡差,間舖有WiFi嘅。冇智能手機或好似我部超慢嘅,舖頭有tablet可以借。
 
貨品只可以買一件,用佢個app scan個bar code,就會落咗入購物籃同即時知道攞咗幾多錢嘢。

攞完嘢就自己check out。我費事同一個月又再去,所以一次過攞盡55歐嘅嘢。

我呢次攞得十二樣嘢咋,因為佢啲嘢都幾貴吓。

買嘢後嘅兩至五日會收到問卷調查。做咗問卷嘅, 下個月可以最高攞多價值10歐嘅嘢喎。  

問卷原來唔可以寫嘢發表意見,只係剔剔剔。完成一個問卷會賺咗0.25歐至 3歐。

因為又要揸住部平板,又要拖住實體購物車,冇手四圍影相。以下條片大致可以了解間嘢點運作(德文)。

嚟梗嘅六月喺德國科隆會開分店,已經通知咗德國friends。

20 則留言:

  1. 前排睇左無人咩咩外賣, 遲D真係外賣仔同收銀阿姐都失業

    回覆刪除
  2. 這市場調查都複雜,
    究竟是調查是“無人超市”服務,
    還是個別商品消費模式,
    如果優惠是簡單直接,
    我都會參與的!哈哈!

    回覆刪除
  3. 咁超巿裡有冇熟悉的牌子呢??所有都係新貨?!

    回覆刪除
    回覆
    1. 有小量啦,多數都係新牌子同未進軍奧地利市場嘅外國知名牌子。

      刪除
  4. 雖然野貴, 但免費既都幾好呀~
    最多拎少D, 哈哈!

    回覆刪除
  5. 又真係好抵join喎, 王子一於拿多D新野來介紹下啦 !

    回覆刪除

入咗嚟,不如寫幾隻字,留個言啦.