食油回收

食油回收其實我呢邊一直都有。餐廳嘅會有垃圾車嚟收，當然係用者自付啦。而家居食油就要自己拎去垃圾站, 但係垃圾站唔近我屋企。所以我一直都係倒落廁所（盡可能落多多洗潔精）。

有關當局時時都叫人唔好倒落廁所㗎，因為啲油凝固咗會塞坑渠。

最近喺屋企附近一間超市見有個回收機。個膠罌免費提供。

個罌約1L ，有防漏蓋。食油用佢儲起（只收植物油）。

暫時可能係試驗階段。回收地點唔多。收集咗嘅食油會循環再造。

放心，唔係再整食油，係用嚟提煉有機柴油。

打開個蓋，倒啲油落去（最多3L）。然後撳start。部機就會慢慢吸啲油入機身。機頂順便過濾啲渣滓。

完成步驟後會有呢間超市嘅現金券畀你。1L值0.1歐。