局部解封

各地對抗疫情手法不同。香港玩突襲封區。而我呢邊星期一局部解封喇。唔好以為疫情受控喎。奧地利每日仍然超過 1500人新確診。

除咗餐廳酒店，所有嘢都可以開。但係顧客同員工都一定要戴FFP2/ N95。舖頭要控制人流，每20m² 只可以一個客。超市嘅應對係只放置指定數量嘅購物車。有購物車嘅顧客先可以入內購物。

唔可以保持兩米社交距離嘅服務性行業如理髮店, 員工一定要做檢測，最少一星期一次。職員唔可以向顧客提供飲品。而顧客要有48小時內嘅陰性檢測報告。有關檢測可以去檢測中心或藥房做（有少部份藥房提供免費服務）。

低年級學生（約至十歲）恢復面授課。高年級要分兩班，一斑只返星期一二，另一班返三四。星期五home schooling。

低年級學生喺走廊要戴口罩（任何款式）。高班一啲嘅喺課室都要戴。再高班嘅喺課室就一定要戴FFP2/ N95。 

返學嘅學生需要喺學校做自我檢測（每逢星期一三）。政府已經派發檢測工具到學校。

低年級建議喺戶外做，家長可以從旁協助。五年級以上嘅學生喺老師嘅指引下喺課室自己插。

只有有證明喺過去六個月中咗武肺嘅學生先可以豁免檢測。唔做檢測嘅學生只可以home schooling。學生用嘅檢測，好似撩鼻屎咁條嘢唔使插到好入。

體育堂時唔需要戴口罩。但係唔可以做有身體接觸嘅運動。音樂堂就唔可以唱歌。（香港教育局會唔會偷吓師呢？）

宵禁時間縮短到由夜晚八點到朝早六點。