Melktert (Milk Tart)

南非食譜中嘅Melktert 我想整。但係其中要用到almond extract。試過喺大型一啲嘅超市搵，居然冇喎。於是上次去捷克時又搵吓啦，畀我買到。

可惜條癮一過，支嘢就擺咗入冷宮。最近終於出手整喇。

現成酥皮（我用牛油皮）。

775ml 奶，10g 牛油，鹽，肉桂一枝，一滴almond extract，三茶匙麵粉，三茶匙粟粉，兩茶匙雲呢拿味布甸粉，125g 糖，四隻蛋。

麵粉，粟粉，布甸粉用25ml 奶撈好備用。

750ml 奶煮滾，加入牛油，鹽，肉桂，almond extract. 然後落上面嘅粉漿，攪攪攪。最後落50g 糖煲滾。煮杰咗後熄火，錨起肉桂。待涼後落蛋黃。蛋白用75g 糖打至企身，混入奶漿。倒模焗！

焗好後灑上肉桂同糖霜。

我就失敗咗，煮燶咗個奶漿。好彩仲救到， 只有微微燶味。

口感似似地蛋撻。以我個撻模，奶漿下次可以減半。