在家檢測

 奧地利噚日開始喺各藥房有免費檢測工具派。

年滿十五歲，有強制醫保同醫保卡冇隱藏病歷*嘅人都可以每月免費攞五份自我快速檢測工具。

*註＞我估因為opt out咗嘅人，藥房睇唔到你有冇攞過。

政策實施前一日政府都未公佈派發嘅細節。而報導話全國只有六十萬份，派晒就要等新貨返。

預計好多人會第一日就去攞，藥房工會（？）呼籲市民唔好迫喺同一日嚟。

我就睬你都生芒果，第一日一早見藥房冇人排隊，就入去問佢有冇啦。

另外噚日亦宣佈咗第二階段解封詳情（漠視新感染人數有回升嘅趨勢）。

搵咗Vorarlberg州（瑞士隔籬）做試點。3月15起有陰性檢測報告嘅人可以去露天餐廳，文化活動等。如果疫情冇新爆發，全國就會喺3月27開始准許露天餐廳營業。

文化活動, 酒店就睇吓四月可唔可以開。 

睇新聞發現一個德文新辭彙Ketchup-Impfen (直譯係茄汁疫苗接種). 形容奧地利嘅接種速度好似倒茄汁咁,唧極都唔出.